အခုတလော အင်တာနက်စာမျက်နှာပေါင်းများစွာမှာ ဆရာဝန်တွေကိုနည်းမျိုးစုံနဲ့ဝေဖန်တိုက်ခိုက်နေတာတွေကို
ဖတ်ပြီး ကျွန်တော်တော့အတော်လေးစိတ်ပျက်မိတော့တာပါပဲ။ ဒီကာလမှပဲ ဖေ့စ်ဘုတ်ကြီးကပေါ်လာ
လူတွေလဲ အင်တာနက်ကိုလက်လှမ်းမှီလာကြတော့ ရေးချင်တိုင်းကို ရေးနေကြတော့တာပါပဲ။ မြန်မာလူမျိုးတွေရဲ့ထုံးစံအရ
တယောက်ယောက်ကစလိုက်ရင် အားလုံးပဲအုံပြီးကိုထင်ရာတွေကို စွတ်ကြိတ်ကြတော့တာပဲ။ နောက်ဆုံးတော့
ဘာအဖြေထွက်လဲ မုန်းတဲ့လူတွေကမုန်း ၊ ဆရာဝန်တွေကို ပုတ်ခတ်ပြီးရေးနေကြတဲ့သူတွေလဲ သူတို့မကောင်းရှာဘူးပြောနေတဲ့
ဆရာဝန်တွေကိုပဲ သွားလေးဖြဲပြီး ဒေါက်တာရယ်လုပ်ပါအုန်း ဆိုပြီး ပါတ်သတ်ကြရအုန်းမှာပဲ
(နိုင်ဂန်ဂျားကိုပဲ သွားကုတော့မယ်ဆိုတဲ့ ကိုကိုတွေတော့မပါပေဘူး)။ အားတုန်းလေး ၀င်ပြီးလက်ကမျဉ်းလိုက်မယ်ဆိုတဲ့စိတ်လေးနဲ့
ဝင်ကြိတ်နေကြတာပဲ။
တကယ်တမ်းတော့ ဆရာဝန် ဆိုတာ လူနာအတွက်ကို မကြည့်လို့ကိုမရတာပါ။ အသက်နဲ့ရင်းကစားရတဲ့ပွဲမှာ
သူတို့လူနာတွေကိုတော့ ဘယ်သူမှ သေစေချင်မှာမဟုတ်ပါဘူး။ ပြောချင်တာသာရေးကြပြောကြပေတော့
။ တချို့ဆရာတွေကတော့ ကိုယ့်ရဲ့ပရော်ဖက်ရှင်နယ်ဘက်ကနေပြီး အလုပ်ပျက်အကိုင်ပျက် ခုခံရေးသားပြီး
အလုပ်အကိုင်ပျက် ဒေါသထွက်ရတာပဲအဖတ်တင်တယ်။ ရေးတဲ့လူကလည်း ဘာတော့ဖြစ်သင့်နေပြီ ဘာတော့မဟုတ်တော့ဘူး
ဆိုပြီး သူ့ပါတ်ဝန်းကျင်ကွက်ကွက်ကလေးကိုကြည့်ပြီး ဆရာဝန်လောကကြီးတော့ဖြင့် ဘာဖြစ်တယ်
ညာဖြစ်တယ် ဟစ်လို့ တကိုယ်ရေလွတ်လပ်ပိုင်ခွင့်ကို (ဒီမိုကရေစီခေါ်မလားမသိ) အပြည့်အ၀အသုံးချပြီး
ဟစ်တိုင်တက်နေတာမျိုးတွေကို ကျွန်တော်တို့တုံပြန်နေမယ်ဆိုရင်တော့ ကျွန်တော်တို့ပဲ ငပေါဖြစ်တော့မှာပေါ့။
တကယ်တမ်းမှားခဲ့တဲ့ဆရာဝန်က ဘာမှဝင်မပြောပဲ ကိုယ့်အလုပ်ကိုယ် ကောင်းကောင်းလုပ်တဲ့ဆရာဝန်ကြီးတွေက
မခံနိုင်ပဲအပင်ပန်းခံဝင်ရှင်းနေတာကြည့်တော့ ပင်ပန်းလိုက်တာ။ အဲဒီတော့ ကျွန်တော်တို့
အလုပ်အပေါ်မှာ ကျွန်တော်တို့ဘယ်လောက်ဖြူစင်တယ်ဆိုတာ ကျွန်တော်တို့သာအသိဆုံးပါ။ အဝေဖန်အပြောအဆိုကတော့
ဘယ်တော့မှ လွတ်မှာမဟုတ်ဘူး။
ကြားဖူးကြတဲ့ ပုံပြင်လေးလိုပေါ့ ။ တခါက သားအဖနှစ်ယောက်က
ရွာတရွာကနေ မြင်းဝယ်ပြီးပြန်လာကြသတဲ့။ သားအဖနှစ်ယောက်လုံး မြင်းအသစ်လေးကိုဆွဲလို့ပေါ့.။
လမ်းကရွာတရွာရောက်တော့ ရွာသားတချို့ကတီးတိုးပြောကြသတဲ့ `ဒီသားအဖနှစ်ယောက်နှယ် မြင်းဝယ်လာပြီးတော့
မစီးပဲ ဆွဲလာရတယ်လို့ကွာ … ပိန်းလိုက်တာ´ ဆိုပြီးပြောကြသတဲ့။ အဲဒါနဲ့ အဖေကောသားရော
မြင်းပေါ်တက်စီးလာ ပြီး နောက်ရွာရောက်တော့ ရွာသားတွေကပြောကြပြန်ရော ` ဒီသားအဖနှစ်ယောက်နှယ်
သတ္တ၀ါလေးကို မညှာမတာ နှစ်ယောက်လုံးတက်စီးလာရတယ်လို့ အကြင်နာတရားမရှိကြဘူးလား´ လို့ဝေဖန်တော့
အဖေလုပ်တဲ့သူက မြင်းပေါ်ကဆင်းပြီး သားကိုမြင်းစီးခိုင်းပြီး ခရီးဆက်လာကြတာပေါ့။ နောက်ရွာကိုရောက်တော့
ရွာထဲကထပ်ပြောကြပြန်ရော `ဒီသားနှယ် ကိုယ့်အဖေလုပ်တဲ့သူကိုယ်မှ မညှာတာ မြင်းပေါ်ကနေ အခန့်သားလိုက်လို့
ကျေးဇူးမသိတတ်တဲ့သား´ ဘာညာနဲ့ဝေဖန်တော့ သားလုပ်တဲ့သူက အဖေကိုမြင်းပေါ်တက်စေပြီး သူကတော့အောက်ကနေလိုက်ပြီး
ခရီးဆက်လာကြတာပေါ့ကွယ်။ နောက်ဆုံးသူတို့ရွာရောက်တော့ မြင်းပေါ်ကအဖေကို ၀ိုင်းပြောကြပြန်ရော။
`ဒီအဖေနှယ် ဒီသားလေးတယောက်ရှိတာကို မညှာမတာ အခွင့်အရေးယူတယ်တဲ့´ ကဲ သူတို့သာ နောက်တရွာများထပ်သွားဖို့ကျန်သေးရင်
ဘာတွေများဆက်ပြောကြအုန်းမယ်မသိ။ ပုံပြင်ကဒီမှာတင်ဆုံးသွားလို့သာပေါ့။ ကျွန်တော်တို့ဆရာဝန်တွေလဲ
ကိုယ့်အလုပ်ကိုယ်သာ အကောင်းဆုံးလုပ်နေမယ်ဆိုရင် ဘေးကနေ နိုင်ငံတော်ကြီးကို တိုးတက်ပြောင်းလဲစေချင်တဲ့
သူတွေ မီဒီယာသမားတွေရဲ့ ရင်တွင်းဆန္ဓတွေ ပြည့်သွားမှာ အသေအချာပဲမဟုတ်ပါလားခင်ဗျာ။
တောကျီးဂန်း
Posts
0 comments:
Post a Comment