RSS
Facebook
Twitter

Friday, January 4, 2013

ငရဲပြည်သို့ အလည်တစ်ခေါက် ....(၄)

သူ့ပုံစံက တိုက်ပုံအနက်ရောင်ကို သပ်သပ်ရပ်ရပ်ဝတ်ထားပြီး ဆံပင်ရှည်အလည်ခွဲက နဖူးပေါ်မှာ ၀ဲကျနေတယ်။ အသားညိုညို ပိန်ပိန်ပါးပါးနဲ့ ကြည့်လို့ကောင်းတဲ့ရုပ်ရည်မျိုးပါ။ သူ့လက်ထဲမှာကလည်း အကယ်ဒမီရွှေစင် ရုပ်ထုကြီးကိုကိုင်လို့။ ကျုပ်အတွက်တော့ သူ့ပုံစံက အတော်လေးထူးဆန်းနေတယ်။ သူ့ကြည့်ရတာ တခုခုကို အတော်လေးဝမ်းနည်းနေပုံရတယ်။ ကားကူရှင်ကို မှီပြီး သက်ပြင်းတွေပဲတွင်တွင် ချနေတယ်။ ကားအတွင်းပိုင်းက မှောင်နေတော့ သူ့မျက်နှာပေါ်က ခံစားချက်ကိုတော့ အသေးစိတ် မဖော်ပြနိုင်ဘူး။ ကားပေါ်ကလူတွေကလည်း လူသစ်ကို နုတ်မဆက်ပဲ ကိုယ့်အတွေးနဲ့ကိုယ် နုတ်ဆိတ်နေကြတယ်။
          ဒီချာတိတ်ဝင်ပြီးတာနဲ့တပြိုင်နက် ကားထဲကနေပြီး အင်မတန်စိတ်ကသိကအောက်ဖြစ်စရာကောင်းတဲ့ အသံတသံ ထွက်လာတယ်။
          `ကျေးဇူးပြု၍နားဆင်ပါ..မျှာ…ကျွန်တော်တို့ရဲ့ လူပြည့်မှငရဲပြည်သို့ ထွက်ခွာမည့် ငရဲအထူးအမြန်ယာဉ် ဟာ မကြာမီအချိန်အတွင်းမှာ ငရဲပြည်သို့ မရပ်မနားတိုက်ရိုက်ထွက်ခွာတော့မှာ ဖြစ်တယ်…မျှာ..ဒါကြောင့်မို့ လူကြီးမင်းတို့ ငရဲခရီးသွားများအနေဖြင့် မိမိတို့၏ ထိုင်ခုံ ခါးပါတ်များကို စနစ်တကျသေချာစွာပတ်ထားပါရန် အနူးအညွတ်မေတ္တာရပ်ခံအပ်ပါတယ် …မျှာ … ကျေးဇူးတင်ပါတယ် ..မျှာ..´
          ခင်ဗျာ….ဆိုတဲ့စကားလုံးကို ဆွဲဆွဲပြီးပြောတော့ တမျှာတည်းမျှာနေတော့တာပဲ။ ဒီအသံရှင်ကို ကျုပ်ရင်းနှီးနေသလိုပဲ။ ဘယ်နေရာမှကြားဘူးတာပါလိမ့် …. အော်..မှတ်မိပြီ …. ဘောလုံးပွဲကြည့်တိုင်း ကြားနေကြအသံကိုး။ ဒီအသံကြောင့် ကျုပ်နေရာက ထိုင်ခုံခါးပါတ်ကို စမ်းကြည့်လိုက်တယ်။ လူ့ပြည်တုန်းက ထိုင်ခုံခါးပါတ်ဆိုတာ ဘာမှန်းတောင်သိတာမှုတ်ဘူး။ မြန်မာပြည်မှာက ထိုင်ခုံခါးပါတ်ပါတ်တဲ့ဖက်ရှင် သိပ်ခေတ်မစားဘူးလေ။ နိုင်ငံခြားရုပ်ရှင်တွေထဲမှာပဲ ကြည့်ဘူးတာကလား။ ကျုပ်လိုပဲ ဘေးနားက လူတွေက လည်း အူကြောင်ကြောင်နဲ့ ဟိုဆွဲဒီဆွဲလုပ်ကုန်ကြတယ်။
          ကျုပ်ဘေးနားက ရပ်ကွက်အုပ်ချုပ်ရေးမှူးလောင်းကြီးက ကျုပ်ကိုကြည့်ပြီး အူကြောင်ကြောင်နဲ့ လှည့်မေးတယ်။
          `ဒီအပေါက်ထဲ … ထိုးရမှာလား´
          `သိဘူးလေ….ဟုတ်မှာပေါ့´ ကျုပ်လဲ ဇဝေဇ၀ါပဲပြန်ဖြေလိုက်တယ်။ ဟုတ်တယ်လေ…ဒီလူမေးပုံက အကြောကြီးနဲ့။ ဒါမျိုးတော့လာမကြောနဲ့လေ … ဟုတ်တယ်မလား။ ကျုပ်လဲ ထိုင်ခုံခါးပါတ်ပတ်ပြီးတာနဲ့ နောက်ဆုံးရောက်လာတဲ့ လူရွယ်ကို စပ်စုဖို့အားယူလိုက်တယ်။
          ဒီလူ့ကိုကြည့်ရတာ အခုအချိန်အထိ ကြေကွဲလို့ပြီးသေးပုံမပေါ်ဘူး။ ကျုပ်လဲ ဒီကောင့်ကို ဘယ်လို စပ်စုရင်ကောင်းမလဲဆိုတာ အကြံထုတ်ကြည့်လိုက်တယ်။ ရုပ်/သံမှာ မေးသလို `ညီလေးရေ… ညီလေးနာမည် နဲ့ ညီလေး ငရဲပြည်ကို ဘယ်နှစ်ခေါက်မြောက်ရောက်တယ်ဆိုတာပြောပြပေးပါအုန်း´ လို့မေးရင်ကောင်းမလား။ ဒီလိုဆိုလဲ စိတ်ပေါက်ပေါက်နဲ့ထပြီးထိုးနေမှ ခက်ချည်သေး။ ကျုပ်ခပ်ရိုးရိုးပဲ စကားစလိုက်တယ်။
          `ဒီမှာ…အဟမ်း´
ကိုယ်တော်ချောက မသိသလိုပဲ။ ကူရှင်ပေါ်တင်ထားတဲ့ခေါင်းကို တချက်လေးတောင်ငဲ့မကြည့်ဘူး။
          `ဒီမှာ ညီအစ်ကို…ခင်ဗျားကြည့်ရတာ အတော်လေးစိတ်ညစ်နေပုံပဲ။ ဘယ်လိုဖြစ်ပြီး ငရဲပြည်သွားတဲ့ကားပေါ် ရောက်လာတာလဲဗျာ´ ကျုပ်လည်းအတတ်နိူင်ဆုံး ချိုချိုသာသာလေး စပ်စုလိုက်တယ်။
          `ကျွန်တော်တယောက်ထဲ အေးဆေးနေပါရစေဗျာ´
ဒီငနဲက ကျုပ်ကိုလိုလိုလားလားသိပ်မရှိတဲ့ပုံပဲ။ ပါးစပ်ကလည်း `ငါမလုပ်သင့်ဘူး …ငါမလုပ်သင့်ဘူးနဲ့´ တယောက်ထည်းတိုးတိုးတိုးတိုး ပြောနေတယ်။ ဒီလိုနည်းမရတော့ နောက်တနည်းနဲ့စပ်စုတာပေါ့ဗျာ။ ဒါမှ လူ့ပြည်ပြန်ရောက်ရင် စာလေးဘာလေးရေးဖို့ ကုန်ကြမ်းရမှာလေ။ အခုတလော မြန်မာ့စာဖတ်ပရိတ်သတ် တွေကြားမှာ ဖြစ်ရပ်မှန်အတွေ့အကြုံတွေက အတော်လေးခေတ်စားနေတာကလား။ ထောင်တွင်း အတွေ့အကြုံများတို့ ၊ ခေတ်သစ်ဟင်္သာကိုးသောင်းပုံပြင်တို့ ဘက်(စ)ဆဲလားတွေဖြစ်နေတာပဲကြည့်လေ။ ကျုပ်လဲ `ငရဲပြည်သွားတောလား´ ဆိုပြီး စာအုပ်လေးတအုပ်တော့ ထုတ်ဖြစ်အောင်ထုတ်မယ်လို့ တေးထားလိုက်တယ်။ ငရဲမင်းက ကျုပ်ကိုလူ့ပြည်ပြန်လွှတ်ရင်ပေါ့လေ။
          `အော် … ခင်ဗျားမှာ စိတ်ညစ်စရာတွေရှိသလို ကျုပ်တို့မှာလဲရှိတာပေါ့ဗျာ….လူ့ပြည်မှာနေရင် ခင်ဗျား အကြောင်းတွေ ကျုပ်စိတ်လဲမ၀င်စားဘူး သိလို့လဲ အကျိုးမထူးပါဘူးဗျာ… အခုဟာက ကျုပ်တို့က ခရီးတခုထဲ အတူတူသွားနေကြတဲ့သူတွေလေ …. တယောက်အကြောင်းတယောက်သိထားတော့ အကူအညီလိုရင်လည်း အဆင်ပြေတာပေါ့…´ လို့အစချီပြီး ကျုပ်ဆရာဝန်တယောက်ဖြစ်တယ်ဆိုတာရယ် …. ကျုပ်မြောနေလို့ ငရဲမင်းဆီမှာ သွားပြီး အင်တာဗျုးဝင်ရမယ်ဆိုတာတွေကို အတိုချုံးပြောပြလိုက်တယ်။
          ကျုပ်အကြောင်းကြားတော့ သူနည်းနည်း စိတ်သက်သာရာရသွားတယ်ထင်ပါတယ်။ နဲနဲ လှုပ်လှုပ်ရှားရှား ဖြစ်လာတယ်။
          `ကျွန်တော်လည်း …. မြောနေတာဗျ´
ဟုတ်ပြီ။ ကျုပ်ရဲ့ဆွဲဆောင်စည်းရုံးတဲ့နည်းလမ်း အောင်မြင်ဖို့များနေပြီ။ သူစကားပြောချင်လာပြီ။
          `အာ…… စိတ်မကောင်းလိုက်တာဗျာ….ဘာပဲပြောပြော အဆိုးထဲက အကောင်းပေါ့ဗျာ… လမ်းခရီးမှာ ကျုပ်တို့ အဖော်ရတာပေါ့´ ကျုပ်က ပြောပြောဆိုဆို သူ့ကို လက်ဆွဲနုတ်ဆက်ဖို့ လက်ကမ်းပေးလိုက်တယ်။
          `ဒါနဲ့ … ခင်ဗျားအကြောင်းတွေကို ကျုပ်ကိုပြောပြအုံးလေ´ ကျုပ်လဲ ဂွင်ထဲဝင်ပြီဆိုပြီး အတင်းစပ်စု လိုက်တယ်။
          `ပြောရမှာတော့ အရှည်ကြီးပဲဗျ …. ခင်ဗျားကျွန်တော့်ကိုမသိဘူးလား´ သူ့အမေးကြောင့် ကျုပ်လဲ နည်းနည်းတော့တွေသွားတယ်။
          `ကျွန်တော် … ရုပ်ရှင်မင်းသားနောင်နောင်လေ´
          `ဟာဗျာ … ဘယ်လိုဖြစ်တာလဲဗျာ….. ခင်ဗျားအကယ်ဒမီရတာမှ သိပ်မကြာသေးဘဲ … ´
          `ခင်ဗျား.. ကျွန်တော့်ကိုသိတယ် …. ဟဗျာ …၀မ်းသာလိုက်တာ´ ဆိုပြီး ကျုပ်ကို ထဖက်မယ်လုပ်တာ ထိုင်ခုံခါးပါတ်ကြောင့် သူ့အကြံအစဉ် မအောင်မြင်လိုက်ဘူး။
          `တော်သေးတာပေါ့ဗျာ….ငရဲပြည်သွားတာတောင် ကိုယ့်ပရိတ်သတ်နဲ့အတူတူတကားထဲကျလို့ ´
ငနဲသားက အတော်လေးစိတ်သက်သာရရသွားတယ်။ တကယ်တမ်းတော့ ကျုပ်လဲသူ့ကိုမမြင်ဘူးဘူး။ အင်တာနက်ပေါ်မှာတော့ သူ့အကြောင်းတွေ အတော်လေးလှုပ်ခတ်နေတာတွေကို ဖတ်ဖူးတာပဲရှိတာ။ ဒါပေသိ ..အမှန်အတိုင်းပြောလိုက်လို့ သူ့စိတ်အကြည်ဓါတ်လေးပျက်သွားရင် ကျုပ်မေးချင်တာတွေ မမေးလိုက်ရရှိမှာစိုးလို့ အသာလေးမှိန်းနေလိုက်တယ်။
          `ဆိုပါတော့ဗျာ….ကျုပ်လည်းကိုယ့်အလုပ်နဲ့ကိုယ် ရုန်းကန်နေရတော့ …ရုပ်ရှင်တွေဘာတွေလည်း မကြည့်ဖြစ်ပါဘူး…. ခင်ဗျားသတင်းတွေကိုတော့ အများကြီးကြားဖူးပါတယ်´ ဒါကတော့ ကျုပ်အမှန်အတိုင်း ပြောလိုက်တာဗျ။ ကျုပ်လည်း မြန်မာကားတွေကြည့်ရင် ရီရလွန်းလို့ မကြည့်ဖြစ်တာကြာပြီ။ သရဲကားလဲရီရ၊ ဖိုက်တင်ကားလဲရီရ၊ အချစ်ကားလဲရီရတော့ ကျုပ်လို လိပ်ခေါင်းရှိတဲ့သူအတွက် အဆင်မပြေဘူးလေ။ သူ့အကယ်ဒမီရတဲ့သတင်းကို ဖေ့ဘွတ်မှာတင်တော့ အောက်ကကွန်မန့်တွေက ဆိုးလိုက်တာဗျာ။
          `ရုပ်ကလည်းဆိုးသေးတယ်…နာမည်လဲတခါမှမကြားဘူးဖူး´
          `ငါတို့ရွာက…နွားကျောင်းတဲ့ဖိုးထောင်ကတောင် သူ့ထက်ချောသေးတယ်´
          `လူရွှင်တော် မော့စ်ကမှ ပိုချောသေးတယ်။
          `မြန်မာ့ရုပ်ရှင်လောကတော့ ပျက်ပါပြီ´ စသည်ဖြင့် မုဒိတာမပွားနိုင်တဲ့သူတွေ ရေးထားတာတွေကို ကျုပ်ဖတ်ဖူးတယ်ဗျ။ ဟုတ်တယ်လေ…. ရုပ်ချောတဲ့သူပဲ အကယ်ဒမီပေးရမယ်လို့ ဘယ်သူကသတ်မှတ် ထားလိုလဲဗျာ။ မြန်မာလူမျိုးတွေက အဲဒါပဲ အသစ်တစ်ယောက်ရောက်လာရင် နှိပ်ကွပ်ဖို့ပဲသိတယ်။ မှတ်ချက်တွေထဲမှာ ဒီထက်ဆိုးတာတွေတောင် အများကြီးပါသေးတယ်။ ဒီမင်းသားလဲ ဒီလိုမှတ်ချက်တွေ မခံနိုင်လို့ ကိုယ့်ကိုယ်ကိုသေကြောင်းကြံတာလားမသိ။
          `ကျွန်တော်နားလည်ပါတယ်ဗျာ ….. ကျွန်တော်လည်း ရုံကြီးကားကို ဒါပထမဆုံးရိုက်တာပဲဗျ … ကျွန်တော်က ဇာတ်လမ်းမကြိုက်ရင်လုံးဝမရိုက်ဘူးလေ… ဒီကားလေးက ကိုယ့်ကာရိုက်တာနဲ့လဲလိုက်တော့ အဆင်ပြေသွားတာဗျ … ဒါပေမယ့်ဗျာ´ သူ့လေသံက နည်းနည်းတုန်နေသလိုပဲ။
          `ဟာဗျာ….. စိတ်မကောင်းဖြစ်မနေပါနဲ့ … မြန်မာပရိတ်သတ်တွေက ဒီလိုပါပဲ .. အနူပညာစစ်စစ်ကို သိပ်မှ မခံစားတတ်တာ … နောက်ပြီးတော့ ခင်ဗျားကလည်း သူတို့နဲ့ နည်းနည်းစိမ်းနေတာကိုးဗျ…. ဘာပဲပြော ပြော ထိုက်တန်လို့ရတာပဲဗျာ… ကျုပ်ကတော့ တကယ်ချီးကျုးတယ်´ ကျုပ်လဲ သူစိတ်ဓါတ်ကျမှာဆိုးလို့ ပါးစပ်ထဲတွေ့တာတွေ ပြောချလိုက်တယ်။  ကျုပ်အထင်မမှားဘူးဆိုရင်တော့ သူပရိတ်သတ်တွေရဲ့မှတ်ချက် တွေကို မခံနိုင်လို့ သေကြောင်းကြံလိုက်တာပဲဖြစ်ရမယ်။
          `ကျွန်တော်လည်း ဒီကားမှာ အများကြီးအားထည့်ပြီး ကြိုးစားထားတာဗျ … ဒါပေမဲ့ဗျာ ….ပရိတ်သတ်က ကျွန်တော့်ကို….´ သေချာပြီ .. ဒီမင်းသား စိတ်ဓါတ်တအားကျပြီးတော့ ကိုယ့်ကိုကိုယ် လုပ်လိုက်တာပဲနေမှာ။
          `အာ….ဒါတွေပြောမနေပါနဲ့ဗျာ…. နောက်တော့ ခင်ဗျားအနူပညာအရည်အသွေးကိုသိရင် … အားပေး လာမှာပေါ့ဗျာ…. မြန်မာလူမျိုးတွေက အချင်းချင်းတောင် တယောက်ယောက်ချွန်ထွက်လာရင် မနာလို ဖြစ်ကျတာပဲဗျ …. ရုပ်ရည်ဆိုတာလည်း မိဘကပေးတာပဲဗျာ .. ဘယ်တတ်နိုင်မလဲ..  ဒါပေမယ့် ကိုယ့်ကိုကိုယ် သေကြောင်းကြံတာမျိုးတော့ မလုပ်သင့်ဘူးဗျာ … ခင်ဗျားတခုခုဖြစ်သွားရင် ရုပ်ရှင်လောက အတွက် နှမြောစရာကြီးဗျာ´ ကျုပ်လဲ အပိုင်ကို ပြောချလိုက်တယ်။
          `ခင်ဗျား …. ဘာတွေပြောနေတာလဲ´ ကျုပ်နဲနဲတော့ ကြောင်သွားတယ်။
          `အင်  … ကျုပ်က…… မင်းသား ဖေ့ဘွတ်က ကွန်မန့်တွေကိုကြည့်ပြီး ကိုယ့်ကိုကိုယ် သတ်သေတယ်ထင်လို့´
          `ဘာတွေလျှောက်ပြောနေတာလဲဗျာ … ဒီလောက်နဲ့ကျုပ်က သတ်သေစရာလားဗျ .. ဒီလူတွေ ပေါက်ပန်းသေးရေးတာနဲ့သာ သတ်သေကြေးဆိုရင် မြန်မာ့ရုပ်ရှင်လောကမှာ တယောက်မှတောင် ကျန်မှာမဟုတ်ဘူး´ မင်းသား ရှုးရှုးရှဲရှဲနဲ့ ဒေါသထွက်သွားတယ်။
          `အာ….စိတ်ဆိုးပါနဲ့ဗျာ….. ကျုပ်လည်း ခင်ဗျားကားပေါ်ရောက်ရောက်ချင်းမှာ `ငါမလုပ်သင့်ဘူး… ငါမလုပ်သင့်ဘူးနဲ့´ တိုးတိုးပြောနေတာ ကြားလိုက်လို့ … စိတ်ညစ်ပြီး ကိုယ့်ကိုကိုသတ်သေတယ်ထင်လို့ …´
          `ဘယ်ကလာဗျာ….. ကျုပ်အကယ်ဒမီရတဲ့ညက ရင်တွေတအားခုန်ပြီး အိပ်လို့မပျော်လို့ အိပ်ဆေးသောက်တာများပြီး …. မြောနေတာဗျ ….. သိပြီလား´
          `အော် …. ဒီလိုလား …. ဆောရီးဗျာပါ …. ကျုပ်က မင်းသားရဲ့အမာခံပရိတ်သတ်တယောက်ပါ´ ကျုပ်လဲဇက်ကလေးပုပြီး မင်းသားကို ပိတ်ချော့ပစ်လိုက်တယ်။
          `ရပါတယ်ဗျာ …. ကျွန်တော်စိတ်မဆိုးပါဘူး ….. အနူပညာရှင်ဆိုတာ … ခွင့်လွှတ်တတ်ရတယ်ဗျ´
သကောင့်သားက အရေးထဲမှ အသားဝင်ယူနေသေးတယ်။ ငရဲပြည်ခရီးသွားကားလေးကတော့ ရန်ကုန်လမ်းတွေမှာမောင်းသလို ခုန်ဆွခုန်ဆွမဟုတ်တော့ပဲ တရိပ်ရိပ်နဲ့ပြေးနေလေရဲ့။

(ဆက်လက်ဖော်ပြပါမည်)
မှတ်ချက်။        ။မကြာသေးမှီကမှ အကယ်ဒမီဆုကို ပူပူနွေးနွေးဆွတ်ခူးထားသော ကျွန်တော်၏ သူငယ်ချင်း ရုပ်ရှင်မင်းသားနောင်နောင်ကို ဤဆောင်းပါးဖြင့် ဂုဏ်ပြုပါသည်။ (မဟုတ်ရင် …. တရားတွေဘာတွေဆွဲနေမှ ခက်ရချည်သေး)

0 comments:

Post a Comment