မန္တလေးဒဏ်ရာ

ဒီအိမ်ကလေးကို ပြန်ရောက်လာတိုင်း ဒီခံစားချက်တွေက ဘယ်ဆီကရုန်းကြွလာမှန်းမသိ ပေါ်လာတတ်ပါလားဆိုတာကို ကျွန်တော်ထိတ်လန့်တကြားသတိပြုမိသည်။ သည်အိမ်ကား ကျွန်တော်ကြီးပြင်းခဲ့သောအိမ်။ ကျွန်တော်တို့မောင်နှမတွေ လူလားမြောက်ခဲ့သော အိမ်။ ကျွန်တော့်ဘ၀၏ အစွဲများ၊ ဒဏ်ရာများ၊ မျှော်လင့်ချက်များ အမာရွတ်ထခဲ့သော အိမ်။ ထို‘အိမ်’ ဆိုသော စကားလုံး၏ အဓိပ္ပါယ်ကို မြန်မာဘာသာဖြင့် ပြည့်စုံအောင် ကျွန်တော်ရေးမပြတတ်သည်မှာ ကြာခဲ့လေပြီ။

သည်အိမ်သည် ကျွန်တော့်၏ အိမ်ဟူသော အတွေးကို ကျွန်တော်ချွန်းအုပ်ခဲ့သည်မှာ ကြာခဲ့လေပြီ။ သည်အိမ်သည် ကျွန်တော့်အိမ်မဟုတ်။ အမေ့အိမ်။ အမေ့အိမ်နှင့် မကြာခဏခွဲရဖန်များလာတော့ ရင်ထဲမှ အမာရွတ်က အတော်ရင့်မာနေသည်။ အိမ်မှ ပြန်လာပြီး အိမ်အကြောင်းကို ကျွန်တော် ချက်ခြင်းမေ့ပစ်သည်။ ကျွန်တော့်ကို ပူလောင်စေသည့် အတွေးမျိုးကို ကျွန်တော် ရေရှည်မွေးမထား။ အိမ်နှင့်ပါတ်သက်သော အချက်အလက်များ၊ နွေးထွေးမှုများ၊ လုံခြုံမှုများ အကြောင်းကို ဦးနှောက်နှင့်နှလုံးသားတို့၏ အနက်ရှိုင်းဆုံးတနေရာတွင် လုံခြုံစွာ ပြန်လည်သိမ်းဆည်းထားသည်မှာ အကျင့်တခုလိုပင်ဖြစ်နေပြီ။ ကျွန်တော်ဒီနေရာကို ဘယ်အချိန်ပြန်ရောက်မည်ဆိုသည်မှာ မသေချာ။ ကျွန်တော်ကား သင်းကွဲခဲ့ပြီ။ သင်းကွဲငှက်သည် အသိုက်မှပြန်လျှင် လည်ပြန်လှည့်မကြည့်ပဲ ပြန်လေသည်။ သို့သော် တကြိမ်ကြိမ်တော့ ပြန်လာအုံးမည်။
ဒီနေ့လည်း ကျွန်တော်အိမ်ပြန်လာသည်။ အိမ်ရောက်လုရောက်ခင်မှာပင် အမေနှင့်ညီမလေး ကလမ်းထလျှောက်နေသဖြင့် ဆိုင်ကယ်ကယ်ရီကို ကျုံးဘေးတွင်ရပ်ခိုင်းပြီး ကျွန်တော်ဆင်းလိုက်သည်။ ကျွန်တော့်ကျောထက်တွင် ကျောပိုးအိတ်အစုတ်တလုံး လက်ထဲတွင်တော့ အိမ်အတွက်မဟုတ်သော လူကြုံပါးလိုက်သည့် မုန့်ထုပ်တထုပ်ပါလာသည်။ မန္တလေးဆောင်းတွင်းနံနက်က နေလို့ကောင်းလောက်အောင် အေးမြနေသည်။ သူငယ်ချင်းထံမှ လိုရမယ်ရ ငှားလာသော အနွေးထည်ပါးတစ်ထည်က ကျွန်တော့်ကို အတန်ငယ်နွေးထွေးစေသည်။ သစ်ရွက်ခြောက်တွေတော့ ဟိုတစသည်တစကြွေနေလေပြီ။ မကြာမီ နွေဦးရောက်တော့မည်။ ကျွန်တော့်အတိတ်တွင် မန္တလေးနွေဦးသည် အပျိုရိုင်းတယောက်လို ကပိုကရိုလှပပါပေသည်။ ကျွန်တော်တို့သားအမိသုံးယောက်စကားတပြောပြောဖြင့် မန္တလေးတောင်ဘက် ဆက်လျှောက်ကြသည်။ ငယ်ရွယ်စဉ်အချိန်က မန်းတောင်ခြေရှိ အကြော်တဲငယ်လေးတခုတွင် ကျွန်တော်တို့သူငယ်ချင်းတသိုက် မီးလုံရင်း ကောက်ညှင်းပေါင်းစားခဲ့သည်အချိန်များကို အမှတ်ရနေမိသည်။ အမေက သူ့အတွက်မဟုတ်သော မုန့်ထုပ်ကိုဆွဲလျှက်။ ကျွန်တော့်ညီမကတော့ ပေါ့ပါးလတ်ဆတ်နေသည်။ အကိုကြီးဒီတခေါက်ပြန်လာတာ လူလိုသူလိုပါပဲလားဟု ရယ်ရွှင်ဖွယ်မှတ်ချက်ပေးသောအခါ ကျွန်တော့်အတွင်း အဇျတ္တသည် ကြီးစွာတုန်လှုပ်သွားလေသည်။ ကျွန်တော်၏ အနက်ရှိုင်းဆုံးနေရာတွင် ထိုးထည့်ထားသော်လည်း မကြာမကြာပြန်ပေါ်လာတတ်သည့် ဒဏ်ရာသည် ကဆုန်ပေါက်၍ ပြန်လည်ထကြွလာသည်။
ကျွန်တော်အသက်က ကြီးလှပြီမဆိုနိုင်သေးသော်လည်း သုံးဆယ်နားနီးပြီ။ ကျွန်တော်ဘာတွေ ပိုင်ဆိုင်ထားပြီးပြီလည်း လည်ပြန်လှည့်ကြည့်တော့ ဆင်းရဲသားမာနက ကျွန်တော်ကို့ မဲ့ပြုံးပြုံးပြသည်။ ကျွန်တော့်မိဘထားပေးသော ပိုက်ဆံဖြင့် ဆရာဝန်တယောက်ဖြစ်လာခဲ့သည်။ မိဘထောက်ပံ့သော ငွေကြေးဖြင့်ပင် ခွဲစိတ်အထူးကုကျောင်းသားတယောက်အဖြစ် ပိန်မသာလိမ်မသာ ရုန်းကန်နေရသေးသည်။ ကျွန်တော့စိတ်ထဲတွင် မိသားစုအတွက် ဆိုသော စာစီစာကုံးခေါင်းစဉ်အောက်တွင် စာတလုံးမျှ မရေးနိုင်သော ကျောင်းသားတယောက်လို မလုံမလဲခံစားရသည်မှာ သည်တကြိမ်ထဲမကတော့။ ဤခံစားချက်က ဘယ်လောက်ကြာကြာ အဓွန့်ရှည်တည်တံ့နေအုံးမည်ကို ကျွန်တော်မမှန်းနိုင်။ သည်ကြားထဲ အိမ်ထောင်သားမွေးကိစ္စက ကြားဖြတ်ရွေးကောက်ပွဲဝင်သည်။ ဒီတခေါက်လာရခြင်းအကြောင်းတွေထဲမှာ အမေ့ကို မိန်းမယူဖို့ကိစ္စဖွင့်ပြောရန်လည်း ပါသည်။  မြန်မာလူမျိုးအများစုအမြင်အရ ဆရာဝန်အလုပ်သည် ထမင်းမငတ်။ ဆရာဝန်တွေချမ်းသာသည်။ လက်ဖျားငွေသီးသည်။ မှန်သင့်သလောက် မှန်မည်ဖြစ်သော်လည်း အရင်းအနှီးကြီးလှသည်။ ငွေကြေးတစုံတရာကို ထားဦး သူ့ထက်တန်ဖိုးရှိသည့် အချိန် နှင့် မိသားစုကိုရင်းရသည်။ တကယ်တမ်းဆေးပညာနှင့် အသက်မွေးဝမ်းကျောင်းဖို့တော့ ကျွန်တော့်အတွက် မလွယ်။ စေတနာကိုထုပ်ပိုးရောင်းချသလိုမျိုးဖြစ်နေသည်။ ဆေးရုံမှာ တနေကုန်ပင်ပန်းပြီး ညနေပိုင်း ဆေးခန်းသို့ပြေးရသည့်ဒုက္ခကို ဆရာဝန်အတော်များများ သဘောမကျကြောင်း ကျွန်တော်လောင်းရဲသည်။ လက်တွေ့တွင်တော့ တနေ့တာ ညနေပိုင်းဆေးခန်းထိုင်ချိန်ဝင်ငွေမှာ တလလုံး ဆေးရုံမှာအလုပ်လုပ်တာထက်ပင် ပိုရကောင်းရနိုင်သည်။ ကျောင်းသားဖြစ်နေသဖြင့် အချိန်ပြည့်ဆေးခန်းမထိုင်နိုင်။ ဟိုဆေးရုံသည်ဆေးရုံနှင့် ဗျာများနေသည့်အပြင် ပညာဆိုသော ရွှေအိုးကို ခက်ခဲစွာဖြည့်တင်းနေရသေးသည်။ အချိန်ပိုင်းဆေးခန်းထိုင်သည့် အလုပ်ကို ကျွန်တော်ငြင်းပယ်ခဲ့သည်။ ပရဟိတဆရာဝန်ဘ၀ကို ပိုပြီးနှစ်ခြိုက်လာသည်။ အတ္တနှင့်ပရ လုံးထွေးသတ်ပုတ်နေသည်ကို စိတ်မသက်မသာ ထိုင်ကြည့်နေရသည်နှင့်ပင် ကျွန်တော် အသက်တဖြည်းဖြည်းကြီးလာသည်။ ကျွန်တော့်နေ့စဉ်မှတ်တမ်းထဲတွင် မိသားစုဆိုသော စာသားတွေက ဖျော့တော့ပြီး ပိန်ရှုံ့နေသည်။ တာဝန်တွေ ၀တ္တရားတွေထက် ပိုမိုတန်ဖိုးရှိသော အရာများကို ကျွန်တော်လျှစ်လျှူရှုခဲ့သည်။

          အမေ့အိမ်ရှေ့ရောက်တော့ မြူခိုးတွေက မပျောက်ခြင်သေး။ မန္တလေးဆောင်း၏ ဆွတ်ပျံ့လှသော လေနူအေးက ကျွန်တော့်အပေါ် ဘယ်သောအခါမှ ပြောင်းလဲခြင်းမရှိ။ ငယ်စဉ်က ကြီးမားခိုင်ခံသည်ဟု ထင်ထားသော အမေ့အိမ်မှာ လက်ရှိအချိန်တွင် သေးငယ်လွန်းလှသည့် ၀န်ထမ်းအိမ်ခန်းလေး တခုသာဖြစ်သည်။ ခြံစည်းရိုးတံခါးများက ရာသီဥတုဒဏ်ကြောင့် အားအင်ချည့်နှဲ့နေသော်လည်း အမေ့ရင်ခွင်၏ လုံခြုံမှုသည် အားလျှော့မသွား။ သည်အိမ်လေးထဲတွင် လောကဓံကိုခက်ခဲစွာ ကျားကန်ပြီး ကျွန်တော်တို့မောင်နှမနှစ်ယောက်ကို ပြုစုပြိုးထောင်ပေးခဲ့သည့် အဖေနှင့်အမေသည် မကြာခင် ပင်စင်ယူရပေတော့မည်။ နိုင်ငံဝန်ထမ်းအဖြစ် အနှစ်သုံးဆယ်ကျော် အမှုထမ်းခဲ့သည့် အမေနှင့်အဖေ ပင်စင်ယူပြီးနေထိုင်ရန် ကိုယ်ပိုင်အိမ်မရှိခြင်းကို ကျွန်တော် ဂုဏ်ယူသည်။ အိမ်ရှေ့တွင် ကျွန်တော်တို့ ငယ်စဉ်ကတည်းက ကောက်ညှင်းပေါင်းနှင့်ပဲပြုတ် ရောင်းနေသော အဒေါ်ကြီးတယောက်ထံတွင် အမေကောက်ညှင်းပေါင်းဝယ်နေသည်။ ကျွန်တော် ကောက်ညှင်းပေါင်း(ငချိတ်ပေါင်း) ကြိုက်သည်ကို အမေဘယ်တော့မှမမေ့။ အဒေါ်ကြီးက ကျွန်တော့်ကို မှတ်မိ၍ အရင်အတိုင်းပဲ ဘာမှမပြောင်းလဲဘူးဟု ပြုံးပြီး မှတ်ချက်ပေးသည်။ ဟုတ်သားပဲ။ ကျွန်တော် အသက်တွေသာကြီးလာတယ် မိဘကို ဘာမှ မထောက်ပံနိုင်သေးဘူးပဲ။ အရင်လို လက်ဖြန့်ခံတောင်းဖို့ကလွဲပြီး ကျွန်တော်လုပ်နိုင်တာတွေ ဘာမှမပြောင်းလဲသေးပါလား။ ကျွန်တော့်အတွေးတွေကလေးလံနေသည်။ ညီမလေးကျောင်းစရိတ်၊ အဖိုးနှင့်အဖွားဆေးဖိုး၊ အမေ့ကျန်းမာရေး။ ကျွန်တော်မဖြေနိုင်သော မေးခွန်းတွေက များနေသည်။  ဆောင်းမနက်ခင်း စောစောစီးစီးတွင် ကျွန်တော့်အတ္တက ချွေးဒီးဒီးကျလျှက်။

          အိမ်ထဲဝင်တော့ လွန်ခဲ့သော ဆယ်ငါးနှစ်က အငွေ့အသက်တွေက ကျွန်တော့်ကို ဆီးကြိုသည်။ သည်အိမ်သည် အမေ့အိမ်။ မိသားစု၏ နွေးထွေးမှု အငွေ့အသက်တွေ ဖြည့်သွင်း ထားသည့်အိမ်။ ကျွန်တော့်အိမ်မက်တွေ မပီမပြင်ထုဆစ်ခဲ့ရသည့်အိမ်။ ရင်ခုန်သံတွေ အစပြိုးခဲ့သည့်အိမ်။ သို့သော် အမေကိုယ်တိုင်မပိုင်။ ကျွန်တော်လည်းမပိုင်။ ပင်စင်ယူလျှင်ခွဲခွာရအုန်း မည့်အိမ်။ အဆင့်မြင့်ပညာတွေကို လေ့လာဆည်းပူးနေသည့်သားတယောက်ကအနေဖြင့် ကျွန်တော် လုပ်ပေးနိုင်သည်က ………။ ထမင်းစားခန်းထဲမှ အမေ့ခေါ်သံကြောင့် တွေးလက်စပြတ်သွားသည်။ အမေနယ်ပေးသော ကောက်ညှင်းပေါင်းက ကျွန်တော့်သွေးသားတွေကို နွေးထွေးစေသည်။ ရေနွေးပူပူနှင့် ကောက်ညှင်းပေါင်းကို မျှောချရင်း ကျွန်တော့်စိတ်တွေက မှောင်မဲနေသော အနာဂတ်ထဲတွင် လမ်းပျောက်နေသည်။ အမေ့ကို မိန်းမယူမည့်ကိစ္စပြောရန် ကျွန်တော် အတော်အားမွေးရအုံးမည်။ အပြင်ဘက်တွင်တော့ ထူထဲလှသည့် မန္တလေးဆောင်း၏ မြူမှုန်ထုကို နေမင်းက ထိုးဖောက်ရန် အားယူနေလေသည်။

ကျွန်တော်နှင့်ပန်းသီး

   

          အခုတလော စာမကျက်ဖြစ်သည့်ရက်တွေများနေသည်။ သေချာတွေးကြည့်လျှင် အခုတလော ဆိုသည့် အချိန်ပြပုဒ်က အတော်လေးကြာခဲ့သော အချိန်တခုကို ရည်ညွန်းသည်ဟု ဆိုရမည်ဖြစ်သည်။ အင်တာနက်တက်လိုက်၊ ဂိမ်းဆော့လိုက်၊ မူဗီကြည့်လိုက်နှင့် အချိန်တွေက ကုန်မှန်းမသိ ကုန်နေသည်။ စာဖတ်ရမည်ဆိုသော အတွေးလေးရှိသည့်အတွက် ကိုယ့်ကိုကိုယ် ကျေနပ်မိသည်။ စာဖတ်ဖို့ဆိုတာ ထင်သလောက်တော့မလွယ်။ ကျွန်တော်က သူများတွေလို စာအုပ်ကောက်ကိုင်ပြီး တမော့တမော ထိုင်တတ်သူမျိုးမဟုတ်။ တိတ်ဆိတ်သောပါတ်ဝန်းကျင်၊ ကြည်လင်သောစိတ်ထား၊ မျှတသောရာသီဥတု၊ သင့်တော်သော အဟာရ နှင့် ပြင်းပြသောဆန္ဒ ဤ ငါးမျိုး အကြောင်းတိုက်ဆိုင်မှ စာဖတ်ဖြစ်သည်။ လူတယောက်၏ အသားကို ဓါးဖြင့်လှီးမည့် ခွဲစိတ်ဆရာဝန်အလုပ်သည် စာများများဖတ်ရမည်ဟု ဆရာတွေက မကြာခဏ ဆုံးမသည်။ ဟုတ်တော့လည်းဟုတ်သည်။ လူတယောက်ကို မေ့ဆေးပေး အသက်ရှုရပ်အောင်လုပ် ပြီးမှစက်နှင့်ရှုခိုင်း၊ ဗိုက်ကိုခွဲ အူတွေထုတ် ဒီအလုပ်တွေကို ကျွမ်းကျင်ပိုင်နိူင်စွာလုပ်နိုင်ဖို့ စာတွေ အများကြီးဖတ် ဖို့လိုသည်။ ဒါတောင်မှ လူ့အသက်တချောင်းကယ်နိုင်ဖို့ မသေချာသေး။ လူဆိုသည့်အမျိုးက စက်တွေလို မကောင်းသည့်နေရာဖြုတ်လဲ၊ ဂျီးဆေးပြီး ပြန်သုံးလို့ရတာမျိုးမဟုတ်တော့လဲ ခက်သားလား။ မည်မျှပင် ကောင်းမွန်စွာခွဲစိတ်ကုသနိုင်လိုက်သည်ဖြစ်စေ တခြားသေစေနိုင်သည့်အကြောင်းအရာတွေက တပုံတပင် ရှိသေးသည်။ လူနာအသက်က များသောအားဖြင့် ကိုယ့်လက်ထဲတွင်တ၀က် ကံကြမ္မာလက်ထဲတွင်တ၀က် ပေးထားရသည်။ မည်သို့ပင်ဖြစ်စေ ကိုယ့်လက်ထဲက ရှိတာလေးသေချာစေဖို့ စာတော့နာနာဖတ်ရမည် မဟုတ်ပါလား။

          အဓိကပြဿနာက စာဖတ်လို့မရသည့်ကိစ္စ။ ဆရာတွေပြောသလို တနေ့ကို စာဖတ်ချိန်ဘယ်လောက် ပုံသေသတ်မှတ်ထားဖို့က တကယ်တမ်းတော့မလွယ်။ ဆေးရုံနှင့်အိမ်က ခရီးလှမ်းနေတော့ တနေ့အသွားအပြန် ဘတ်စကားစီးချိန်က တနေ့ကို အနည်းဆုံး ၃နာရီတော့ပြေးမလွတ်။ နိုင်ငံတော်မှ ဆေးရုံနားတွင် နေအိမ်များစီစဉ်ပေးလျှင် ပုိုမိုထူးချွန်ထက်မြက်သည့် ခွဲစိတ်ဆရာဝန်ကောင်းတွေ မွေးထုတ်ပေးနိုင်လိမ့်မည်ဟု လွှတ်တော်တွင် အဆိုတင်သွင်းလျှင်ကောင်းမလား မဆီမဆိုင်တွေးမိသေးသည်။ အိမ်ပြန်ရောက်လျှင် လူကနုံးချိချိ။ ဘတ်(စ)ထောင်း၊ ကိုယ်ကြေဟုဆိုရမလိုဖြစ်နေသည်။ ပြန်ရောက်လျှင် စာသင်ရမည့် ညီဝမ်းကွဲ မူလတန်းကျောင်းသားကြီးများရှိသေးသည်။ မူလတန်းစာမခက်သော်လည်း သည်ကောင်တွေကို နားဝင်အောင် စာသင်ရသည့်အလုပ်ကလည်း အတော်ခက်သည်။ သူတို့ကို စာသင်ပြီးချိန်တွင် လူကမလှုပ်ချင်တော့။ အိပ်ယာဆီလို့ မျက်စောင်းအကြိမ်တစ်သိန်းလောက် ထိုးနေပြီ။ သည်လိုနှင့်စာကြွေးတွေက များလာသည်။ နောက်ဆုံးနှစ်စာမေးပွဲကြီးအတွက် ဘာမှမပြင်ဆင်ရသေး။ မဟာသိပ္ပံနောက်ဆုံးနှစ်သည် စာရတိုင်းလည်း မအောင်၊ အောင်တိုင်းလည်းစာမရ ဟုအကြီးတန်းတွေပြောတာကြားဖူးသည်။ ကျယ်ပြန့်နက်နဲသော ဆေးပညာ နယ်ပယ်ကလဲ လေ့လာ၍မကုန်။ စာမေးပွဲကျလျှင် နောက်ထပ်ခြောက်လနေပြီးမှ နောက်ဆက်တွဲပြန်ဖြေရမည်။ တချို့သူငယ်ချင်းတွေကလည်း ဘယ်အချိန်ဆွမ်းခံခံ ဆွမ်းစားချိန်တော့အတူတူပါပဲဟူ၍ အတော်ကောင်းသော ဥပမာလေးတွေပေး၍ နှစ်သိမ့်လေသည်။ ဘယ်လိုပဲဖြစ်ဖြစ် ဆိုးဆိုးဝါးဝါးမကျအောင် တတ်နိုင်သလောက် စာဖတ်ရမည်။ အိမ်တွင် အတည်တကျထိုင်၍ မဖတ်နိုင်လျှင် ဘတ်စ်ကားစီးချိန်တွင်ရအောင်ဖတ်မည်။ ထိုင်ခုံရလျှင် စာကောင်းကောင်းဖတ်၍ ရနိုင်ကောင်းသည်။

          နိုင်ငံခြားသား အတော်များများ လမ်းသွားရင်းစာဖတ်ကြသည်။ ကျွန်တော်တို့နိုင်ငံသို့လာသူများကို လေ့လာကြည့်လျှင်တော့ သိပ်စာမဖတ်ကြ။ အီးပုံတက်နင်းမိ၍ ၊ မြောင်းဖုံးကျွံကျ၍ မဖတ်ရဲကြတာမျိုးလည်း ဖြစ်နိုင်သည်။ လေဆိပ်ကားဂိတ်မီးရထားဆိပ် နေရာအတော်များများ သူတို့စာဖတ်နိုင်ကြသည်။ ဒါကြောင့် လည်း တိုးတက်ကြတာဖြစ်မည်ဟု အတွေးပိုက်မိသည်။ နာရီပေါင်းများစွာ အလုပ်လုပ်နိုင်တာတွေ၊ ဘာသာစကားပေါင်းစုံတတ်ကျွမ်းတာတွေထားအုံး ဒီစာဖတ်တာလေးတခုတော့ သူတို့ဆီက အတုယူသင့်သည်။ ဟုတ်ပြီ ။ ကားစီးရင်း ကျွန်တော်စာဖတ်မည်။

          တကယ်တမ်းကျတော့ ဆေးပညာစာအုပ်တွေက ထူထူထဲထဲလေးလေးပင်ပင်တွေများသည်။ သယ်ရတာကိုက မချောင်။ ကံဆိုးပြီးထိုင်ခုံနေရာမရလျှင် သယ်လာသောစာအုပ်ကို အတော်စိတ်ခုမိသည်။ မိန်းမပျိုလေးများ ခြင်းတောင်းအလွတ်လေးသယ်လာသည်ဆိုရင်ပဲ ကိုင်ထားပေးချင်သူတွေများသော်လည်း ကျွန်တော်လိုရုပ်ကိုတော့ ယောင်၍ပင်လည့်မကြည့်ကြ။ ကျားမခွဲခြားသည့်စနစ်ကို တိုက်ဖျက်နေသူတို့ ဂရုပြုစေလိုသည်။ နေရာရပြန်တော့ ဤစာအုပ်အလေးကြီးကို ကိုင်၍ကြာကြာမဖတ်နိုင်။ လက်ရောဇက်ပါ ညောင်းလာသည်။  နောက်ပြဿနာတခုက လမ်း။ နိုင်ငံခြားကလမ်းတွေ ကောင်းလွန်း၍ ကားဒက်ရ်ှဘုတ်ပေါ် ရေဖန်ခွက်တင်မောင်းတာတောင် ဖိတ်မကျဟု ကြားဖူးသည်။ ဒါကြောင့် နိုင်ငံခြားသားတွေ ကားစီးရင်း သက်တောင့်သက်သာ စာဖတ်နိူင်ခြင်းဖြစ်ရမည်။ ကျွန်တော်တို့နိုင်ငံမှာတော့ ဒီလိုမဟုတ်။ ချိုင့်တရာ ချောက်တကျွင်း လမ်းတွေများသော ရန်ကုန်မြို့တွင် ဘတ်စကားစီးရင်း စာဖတ်ဖူးသူတိုင်း ဤဒုက္ခ သိလိမ့်မည်။ ထိုင်နေရင်း ဘရိတ်ဒန့်ဆွဲလျှင်ဆွဲ၊ မဟုတ်လျှင် ရှေ့ခုံကို နှဖူးနှင့်သွားဆောင့်မိဖို့များသည်။ ပြိုင်ကားဒရိုင်ဘာနှင့် တွေ့လျှင် လက်နှစ်ဘက်ခြေနှစ်ဘက်လုံး လွှတ်မထားရဲသည့်အပြင် ဖင်ပါကြုံ့ထားရသေးသည်။ ခပ်အေးအေး မောင်းသည့် ကားဆရာနှင့်တွေ့လို့ စာဖတ်ရပြီထားတော့ ခုန်ပေါက်နေသောကားပေါ်တွင် အာရုံစူးစိုက်ဖို့ ခက်သည်။ နောက်တခုက အလွန်ပူလောင်အိုက်စပ်သော အဲကွန်းကားကြီးများ မီးပွိုင့်မိလျှင် ကိုရီးယား ချွေးထုတ်ခန်းလောက်ကတော့ သနားသည်။  ထို့ကြောင့် ပါလာသောစာအုပ်ကို နေပူကာရန်နှင့် ယပ်ခပ်ရန်သာ အသုံးပြုပြီး စာဖတ်ရန်မဟာအကြံအစည်ကို လုံးဝစွန့်လွတ်လိုက်ရသည်။ ရန်ကုန်မြို့ကြီးလမ်းတွေကောင်းသွား လျှင် ဘတ်စကားပါတ်စီးပြီး စာတွေတ၀ကြီးဖတ်ပစ်လိုက်မဟဲ့ဟု စိတ်ထဲမှာတေးထားလိုက်သည်။ ကျွန်တော့် ဘကြီးလိုဆန္ဒမပြည့်မှာလဲကြောက်သေးသည်။ လှည်းတန်းကုန်းကျော်တံတားကို လေးလအပြီးဆောက်မည်ဟု စာစောင်များတွင်ပါစဉ်က ဘကြီးပြောဖူးတာရှိသည်။ ငါမသေခင်တော့ လှည်းတန်းကုန်းကျော်တံတားကြီးကို မြင်ရပြီပေါ့ကွာဟုကြိမ်းဝါးဖူးသည်။ ယခုဘကြီးဆုံးတာ ၆လပြည့်တော့မည်။ ဂုံးကျော်တံတားက ငုတ်တို အဆင့်သာရှိသေးသည်။ ထားပါ ဘတ်စကားပေါ်ဖတ်၍မဖြစ်လျှင်လည်း နောက်တနည်းစဉ်းစားရတော့မည်။ အဓိကက စာဖတ်ဖြစ်ဖို့။

          တက္ကနိုလိုဂျီခေတ်တွင် ခါးချိအောင် သယ်ရသောစာအုပ်များကို ကျောက်သင်ပုန်းသာသာ ပစ္စည်းလေး များထဲတွင် တနင့်တပိုးထဲ့ထားပြီးဖတ်နိုင်သည့် အံဘနန်းနည်းပညာတွေပေါ်လာသည်။ ပန်းသီးကော်ပိုရေးရှင်း မှထုတ်လုတ်သည့် အိုင်ပက်များသည် ဈေးကွက်ထဲတွင် ကျော်ကြားလာသည်။ စာဖတ်ရ လွယ်ကူလိုက်ပါဘိ။ ပေါ့ပေါ့ပါးပါးကိုင်ရလွယ်သည်မို့ ထမင်းစားရင်း အီးပါရင်း ဖတ်နိုင်သည်။ ပက်လက်ဖတ်မလား ထိုင်ဖတ်မလား အို…လေးဘက်မှောက်ရက်အကုန်ဖတ်လို့ရသည်။ မီးပျက်လျှင်လဲအေးဆေး။ သူငယ်ချင်း ဆရာဝန်များ ချိုင်းကြားထဲတွင် အိုင်ပက်က ဖက်ရှင်တခုလိုဖြစ်လာသည်။ mobilehealth မှထုတ်ပြန်သော စစ်တမ်းတခု အရဆိုလျှင် ဆရာဝန် ၄၅%နုန်းသည် အိုင်ပက်ကို အိမ်မွေးတရိစ္ဆာန်တကောင်လို နှစ်ခြိုက်စွာ အသုံးပြုကြသည် ဟုဆိုသည်။ ခေတ်မှီသည့်ဆရာဝန်တိုင်း အိုင်ပက်ကိုင်ကြသလိုဖြစ်သည်။ စစ်တမ်းတခုတွင် အိုင်ပက်ကို စွဲလမ်းနှစ်ခြိုက်စွာ သုံးစွဲသူအများစုမှာ တကိုယ်ကောင်းဆန်ပြီး ကြွယ်ဝချမ်းသာလိုစိတ်ပြင်းပြသည့် ပညာတတ် များဖြစ်သည်တဲ့။ ဘယ်လိုပဲဆိုဆို အိုင်ပက်က ဆရာဝန်တွေအတွက်တော့ အတော်လေးအသုံးဝင်သည်ဟု ဆိုကြသည်။ စာအုပ်တွေဖတ်မလား၊ ဆေးဝါးအညွန်းတွေပဲကြည့်မလား၊ အင်တာနက်သုံးပြီး ဆေးပညာစာတမ်း တွေရှာမလား အတော်အလုပ်ဖြစ်သည်ဆိုကြသည်။ ဖင်ကြားသို့ မှတ်စုစာအုပ်ညှပ်သွားစရာမလိုတော့။ အိုင်ပက်ထဲတွင်မှတ်နိုင်သည်။ ထို့ကြောင့်အိုင်ပက်ကို ပို၍စိတ်ဝင်စားလာသည်။ ခက်တာတခုက ဈေးနှုန်း။

             ဈေးကတော့ ကျွန်တော့်အတွက် အတော်လေးကြီးသည်။ သူငယ်ချင်းတယောက်က အိုင်ပက်ကို မွေးဖွားပေးသူ စတိဗ်ဂျော့ဘ် ဖင်ခေါင်းကျယ်၍ ဈေးကြီးကြောင်းပြောပြဖူးသည်။  မြန်မာငွေနှင့်တွက်ပါက လေးငါးသိန်းကျမည်။ လစာတစ်သိန်းကျော် နှင့် မိန်းမရပြီးနေစရာမရှိသေးသော ကျွန်တော့အတွက် လက်လှမ်းမမှီ။ ဒါလေးရှိလျှင် ငါတော့ဖြင့် စာတွေတအားဖတ်ဖြစ်တော့မှာပဲဟု တွေးမိသည်။ အိုင်ပက်ကိုင်သော သူငယ်ချင်းဆရာဝန်များ တွေ့လျှင် သူတော့ဖြင့်အိုင်ပက်ကလေးနဲ့စာတွေတအားဖတ်ဖြစ်နေတော့မှာပဲ ထင်ပြီး အားငယ်စိတ်တွေ ၀င်လာသည်။ သည်လိုနှင့် ကျွန်တော့်တွင် အိုင်ပက်ရောဂါစွဲကပ်တော့သည်။ သူများတွေဖတ်သော အင်တာနက်နည်းပညာဂျာနယ်တွင်ပါလေ့ရှိသော အိုင်ပက်ဈေးနူန်းများကို နည်းတယ်၊ များတယ် ၊မတန်ဘူး စသည်ဖြင့် အသားလွတ်ခွဲခြမ်းစိတ်ဖြာကြည့်မိသည်။ အိုင်ပက်ကိုင်သော သူငယ်ချင်းများထံမှ လက်ချာတွေ နားထောင်ရင်းမှ အိုင်ပက်တွင် စာဖတ်ခြင်းထက်ပို၍ကောင်းမွန်သော စွမ်းဆောင်ရည်ရှိသည့် ကိစ္စများကို သိလာသည်။ အိုင်ပက်လိုစွမ်းဆောင်ရည်မျိုးနှင့် ဈေးပေါသော သင်ပုန်းကွန်ပျုတာများကို လိုက်ရှာကြည့်သည်။ မတွေ့။ ဒီကောင်က တခြားပစ္စည်းတွေနှင့်စာလျှင် အမြဲတမ်းနှာတဖျားသာနေသည်။ ကျွန်တော် တက္ကနိုလိုဂျီ အပြုပြင်ခံဖြစ်မှန်းမသိဖြစ်နေသည်ကို သတိမထားမိ။ ငွေလေးငါးသိန်းကို တလုံးတခဲထဲမသုံးနိုင်သည့်အတွက် အရစ်ကျရောင်းနိုင်မည့် ဆိုင်တွေကို စုံစမ်းကြည့်မိသည်။ ဘဏ်အကောင့်၊ ဟိုထောက်ခံစာ ၊ ဒီထောက်ခံစာတွေ များသည့်အပြင် အတိုးနူန်းကလည်းကြီးမြင့်သေးသည်။ မိန်းမကိုတိုင်ပင်ကြည့်သည်။ ရှင့်စာအုပ်တွေကိုပဲ ကုန်အောင်ဖတ်ပါအုန်း၊ တလတလအလျှင်မီအောင်မနဲလုပ်နေရတဲ့အထဲ ရှင်ဒီဟာတွေနောက်ပဲတကောက် ကောက်လိုက်နေတာပဲ ဟူသည့် တုံပြန်မှုကိုရသည်။ သူပြောတာလည်း ဟုတ်သလိုတော့ ရှိသည်။ ကျွန်တော်ထံတွင် ပြီးအောင်မဖတ်ရသေးသည့် ဆေးစာအုပ်တွေလဲ ရှိသေးသည်။ ဒီလိုနှင့်စဉ်းစားရင်း စဉ်းစားရင်း စတိဗ်ဂျော့်ဘ ကြီးသေပြီး အိုင်ပက်မျိုးဆက်သစ်တွေထပ်ထွက်လာသည်။ နယူးအိုင်ပက်၊ အိုက်ပက် မီနီ။ ဘေးနားက အိုင်ပက်ပိုင်ရှင် သူငယ်ချင်းများကိုလေ့လာကြည့်လျှင် စာဖတ်သူက နည်းလာသည်။ ဂိမ်းဆော့သည်။ အိုင်ပက်နှင့်အင်တာနက်တက်သည်။ ဖေ့ဘွတ်တွင် အချိန်ဖြုန်းသည်။ ဘယ်ဂိမ်းက ဘယ်လိုကောင်းပြီး ဘယ်အပ်ပ(app) ကဘယ်လိုကောင်းကြောင်းဖလှယ်နေကြသည်။ စာအုပ်စင်တွင်တော့ ရနိုင်သမျှဆေးစာအုပ်တွေ ထည့်ထားလိုက်ခြင်းဖြင့် စိတ်ကျေနပ်မှုရသွားသည်။ ဘယ်အချိန်ဖတ်ဖတ်ပေါ့။ ကျွန်တော်ကြုံဖူးသည့် ဆရာကြီးတယောက်ဆိုလျှင် နုတ်ဖြေမေးခွန်းမေးရင်း အိုင်ပက်နှင့်ဂေါက်ရိုက်နေသည်။ ကျောင်းသားကတော့ ဆရာကြီးအိုင်ပက်ကိုင်ပြီးမေးနေတာကြောင့် ဇောချွေးတွေပြန်နေသည်။ ဆရာကြီး၏ ဦးနှောက်ထဲတွင် အိုင်ပက်ထက်အဆတစ်ရာသာသော ပညာတွေရှိသည်။ အသိပညာအတတ်ပညာကို အိုင်ပက်ထဲထည့်ထားလို့မရ။ ပိုက်ဆံရှိသော သူငယ်ချင်းတယောက်ဆိုလျှင် အိုင်ပက်မျိုးဆက် သုံးခုလုံး ၀ယ်၍ စုထားသည် ဟူသတတ်။ စာဖတ်ဖြစ်မဖြစ်တော့မသိ။

          ကျွန်တော့်စာအုပ်စင်ပေါ်တွင် ကျွန်တော်ပြီးအောင်မဖတ်ရသေးသော ဆေးပညာရပ်ဆိုင်ရာ စာအုပ် တွေတပုံတပင်ရှိနေသေးသည်။ တကယ်တမ်းတော့ စာအုပ်တအုပ်ကို လှန်လောပြီး စိတ်ကြိုက်ဖတ်ရသည့် အရသာက အိုင်ပက်ပေါ်တွင် လက်ညှုိးဖြင့်ဟိုပွတ်သည်ပွတ်ဖတ်ရသည်ထက် အများကြီးသာသည်။ စာအုပ်တွေ၏ ခန့်ထည်မှု ရနံ့နှင့်ထိတွေ့မှုကို အိုင်ပက်က မပေးစွမ်းနိုင်ပေ။ စာအုပ်တွေထဲတွင် အိုင်ပက်လို မှော်ဆန်သည့်စွဲဆောင်မှုမျိုးတွေ ပုန်းအောင်းမနေ။ စာအုပ်များသည်သမိုင်းဖြစ်သည်။ စာအုပ်များကို ကျွန်တော် လေးစားသည့်အနေဖြင့် အိုင်ပက်ကို ကျွန်တော်လက်လျှော့လိုက်သည်။ စတိဗ်ဂျော့ဘ်၏ ပဉ္စလက်ဆန်သည့် တီထွင်ဖန်တီးမှုကို ကျွန်တော့မိန်းမစုဘူး နှင့် ကျွန်တော်စာအုပ်စင်က စာအုပ်များနှင့်မလဲနိုင်။ ဟိုမှတ်သည်မှတ် မှတ်စုအတိုအစများနှင့်မလဲနိုင်။ ရှင်းရှင်းပြောရလျှင် သမိုင်းကို ပြောင်းလဲသည့် ပန်းသီးပိုင်ရှင်များကို ကျွန်တော်လေးစားသော်လည်း စတိဂျော့်ဘ်၏ပန်းသီးတလုံးသည်ကျွန်တော့်အတွက် တန်ဖိုးကြီးလွန်းနေသည်။ တကယ်တမ်းတော့ ကျွန်တော်သည် တက္ကနိုလိုဂျီ ဘေးထိုင်ဘုပြောတယောက် လည်းဖြစ်နိုင်သည်။

စာအုပ်တန်းသို့အလည်တခေါက်

          ဒီနေ့စာအုပ်တန်းဘက်ရောက်ဖြစ်သည်။ စာအုပ်တန်းဆိုသော်လည်း စုံစုံလင်လင်တော့မဟုတ် နာမည်ကြီးစူပါမားကတ်တစ်ခု၏ စာအုပ်တန်းသာဖြစ်သည် ရောက်သွားသည့်အချိန်ကနေ့ခင်းဘက်မို့ လူသိပ်မရှိတာလားတော့မသိ ဘေးဘီလှည့်ပတ်ကြည့်လိုက်တော့ ခေတ်ဆန်ဆန်ကောင်မလေးတသိုက်က အလှကုန်ဘက်တန်းမှာ ပစ္စည်းတချို့ကိုအာရုံကျနေသည် ။ သီချင်းတန်းဘက်တွင် ဟစ်ဟော့စတိုင် ကောင်လေးနှစ်ယောက်သုံးယောက်နှင့် စုံတွဲတွေတွေ့ရသည် ။

          စာအုပ်တန်းကိုတာဝန်ယူရသည့် အရောင်းစာရေးမက ကျွန်တော့်ကိုယောင်၍ပင်လှည့်မကြည့် စာအုပ်တစ်အုပ်နှင့်ဇိမ်ကျနေသည် သူ့ပုံစံကြည့်ရသည်မှာ အရောင်းစာရေးမနှင့်ပင်မတူ အတော်လေး စိတ်အေးလက်အေးနိူင်လှသည်။ ဘေးနားကစက္ကူခွက်နှင့် ထည့်ထားသည့်ကော်ဖီကို တကျိုက်ကျိုက်လိုက် တခစ်ခစ်ရယ်လိုက်ဖြင့်အလုပ်များနေသည်။ ထိုကလေးမထံမှအာရုံခွာ၍ စာအုပ်တန်း ဘက်သို့ အာရုံစိုက်လိုက်သည်။ စာအုပ်တွေကို သုတစာပေ၊ ရသစာပေ၊ ကျမ်းမာရေးနှင့် ပညာရပ်ဆိုင်ရာများစသည်ဖြင့် ခွဲခြားထားသည်။ ထိုခေါင်းစဉ်တွေ အတွင်းမ၀င်သည့် စာအုပ်များကိုတော့ ဘယ်မှာထားလဲမသိ။ ရသစာပေတန်းတွင် ဆရာချစ်ဦးညို ၊ ဦးနု ၊မင်းလူ ၊ဂျူး စသည့်နာမည်ကျော် စာရေးဆရာများ၏ လက်ရာမွန်များအပြင် ခေတ်ပေါ်စာရေးဆရာတို့၏ လက်ရာအချို့ကိုလည်းတွေ့ရသည် ။ အများစုကတော့အကြိမ်ကြိမ် ရိုက်နှိပ်နေရသည့် စာရေးဆရာများ၏ ၀ထ္ထုကောင်းများသာဖြစ်သည် နောက်ပိုင်းထွက်တွေကတော့ စာအုပ်သားခပ်ပါးပါး ကာတွန်းပုံများနှင့် စာအုပ်တွေကသာများသည်။

          သုတစာပေဘက်တွင် မကြာသေးခင်နှစ်များက ဘာသာပြန်စာပေဆုရထားသော ဆရာတော်ကောင်းမင်း၏ စာအုပ်ကိုတွေရသည်။ ထိုစာအုပ်ကိုမြင်မှကျွန်တော်သတိရသည် ဟုတ်သားပဲ။ ဘာသာပြန်စာအုပ်တွေကို ဘယ်မှာထားတာပါလိမ့် သုတဘက်မှာလား  ၊ ရသဘက်မှာလား ကျွန်တော်လိုက်ရှာကြည့်မိသည်။ သီးသန့်ခွဲထားသည်ကိုတော့မတွေ့ရ။ စာအုပ်တစ်အုပ်နှင့်ငြိမ့်နေသော စာရေးမကိုအနှောက်ယှက်မပေးလို၍ လှည့်ပတ်ရှာကြည့်လိုက်သည် ဟောတွေ့ပါပြီဗျာ…. သုတစာပေတန်း၏ အပေါ်ဆုံးထပ်တွင် ဆရာမောင်ထွန်းသူ ၏ ရဲတိုက် ၊ဆရာမြသန်းတင့်၏ တက္ကသိုလ်နွေညများ ၊သုခမြို့တော် ၊နှစ်ဘ၀ စာအုပ်တွေကတကယ့်ကိုစာ အုပ်ကောင်းတွေ။ ယခင်ကဖက်ဖူးပြီးသားတွေဖြစ်ပေမယ့် နောက်ပိုင်းထုတ်ဝေသည့် စာအုပ်များကတော့ စာအုပ်အသားရောအဖုံးပါ ပိုကောင်းလာသည်။ ဆရာတို့အသက်အရွယ်အရ ဘာသာပြန်ခဲ့ကြသောစာအုပ် များမှာ ၁၉၆၀ နှင့် ၁၉၈၀ ကြားကာလ ၀ထ္ထုတွေကများသည်။ ဆရာကြီးဒဂုံရွှေမျှား ဘာသာပြန်သည့်ဝထ္ထုများဆို လျှင်ထိုထက်ပင်ရှေးကျသေးသည်။

          ကျွန်တော်တို့ တက္ကသိုလ်ကျောင်းသားဘ၀က ယခုစာအုပ်စင်ပေါ်တွင်တွေ့ရသော ဘာသာပြန် စာအုပ်များအပြင် ရှိရှိသမျှသောဘာသာပြန်စာအုပ်တွေကို မရမကလိုက်ရှာ၍ဖတ်ကြသည်။ ဘာသာပြန် စာအုပ်တွေမှာ ထိုစဉ်ကတည်းက ဈေးကြီးသည်။ ကျောင်းသားဘ၀ဖြစ်သဖြင့် ထွက်သမျှစာအုပ်တိုင်းတော့ ၀ယ်မဖတ်နိုင်။ ဘာသာပြန်တွေနှစ်ခြိုက်သူ ၀ါသနာတူတွေဆီမှ ကိုယ့်တွင်ရှိသည့် စာအုပ်ဖြင့် အလဲအလှယ်လုပ်ပြီး ဖတ်ကြသည်။ ရန်ကုန်ရှိ စာအုပ်ဆိုင်အများစုက ဘာသာပြန်တွေမှာ တန်ဖိုးကြီးပြီး ဖတ်သူနည်း၍ မကိုက်ကြသဖြင့် သိပ်မတင်ကြ။ ရှားပါးသောစာအုပ်များကို စာကြမ်းပိုး ဦးလေးတစ်ယောက်ဆီမှ မရမကငှားပြီး သူငယ်ချင်းတွေနှင့်လဲဖတ်ရသည်။ ဒီလိုဖြင့် ကျွန်တော်တို့ ကြီးပြင်းခဲ့ကြသည်။ ဘာသာပြန်စာအုပ်များဆီမှ စွန့်စားလိုစိတ်များ၊ တီထွင်ဖန်တီးလိုစိတ်များ၊ အနစ်နာခံလိုစိတ်များ၊ ကြိုးစားလိုစိတ်များကို ကျွန်တော်တို့ မိတ္တူကူးခဲ့ကြသည်။

          ထိုစဉ်က ဖတ်ခဲ့သော ဘာသာပြန်စာအုပ်များသည် ယခုအချိန်အထိ စာအုပ်တန်းတွင် ရှိနေဆဲ။ ဘာသာပြန်စာပေ အမျိုးအစားအတွက် ရပ်တည်ပေးနေဆဲ။ အကြိမ်ကြိမ်ရိုက်နှိပ်နေရဆဲပင်ဖြစ်သည်။ သူတို့နေရာ ကိုပိုမိုစည်ပင်လာအောင် ရပ်တည်ပေးမည့် ဘာသာပြန် လူသစ်များကတော့ အတော်လေးနည်း သွားသည်ကိုတွေ့ရသည်။ ကျွန်တော်တို့ကို ကမ္ဘာကြီး၏ နှလုံးသားများနှင့် မိတ်ဆက်ပေးမည့် ဘာသာပြန်စာရေးဆရာသစ်များကို ကျွန်တော်တို့လို ဘာသာပြန်ချစ်သူတွေ မျှော်လင့်နေခဲ့ရသည်မှာ ဆယ်စုနှစ်တခုနီးပါးပင် ရှိခဲ့ပြီ။ သုတ၊ ရသ၊ အချစ်၊ သည်းထိတ်ရင်ဖို၊ စွန့်စားခန်း၊ အနုပညာ၊ ကြီးပွားတိုးတက်ရေး၊ အထ္တုပတ္တိ စသည့် ဘာသာပြန်စာအုပ်ကောင်းတွေကို တမ်းတမိသဖြင့် စာအုပ်တန်းရောက်တိုင်း ဘာသာပြန်ကဏ္ဍကို မဖြစ်မနေ သွားကြည့်ဖြစ်သည်။ တကယ်တမ်းတော့ ဘာသာပြန်စာပေ တခုတည်းမဟုတ် တခြားစာပေ အမျိုးအစားများတွင်လည်း အရည်အသွေးပြည့်ဝသည့် စာရေးဆရာကောင်းများ နည်းသွားသည်ကို စိတ်မကောင်းစွာတွေ့ရသည်။

          မည်သည့် စာပေ အမျိုးအစားမဆို ယူတတ်လျှင်တော့ ကိုယ့်အတွက် ကျန်သည်သာပင်။ သည်လိုစာအုပ်တွေ၏ လမ်းညွန်ချက်တွေကြောင့် ကျွန်တော်တို့ ဘ၀နေနည်းတွေ၊ ယုံကြည်ခံယူချက်တွေ တိုးတက်ပြောင်းလဲခဲ့ရသည်။ စိတ်ထဲတွင်တော့ စာအုပ်ကောင်းဆိုလျှင် အသာငမ်းငမ်း တောင့်တနေဆဲပင်။ အဘဲ့ကြောင့် စာအုပ်ကောင်းတွေ နည်းသွားရသနည်း။ အဖြေမရှိသော မေးခွန်းကို ကိုယ့်ကိုကိုယ် ပြန်မေးနေမိသည်။ သေချာတာတခုကတော့ လူငယ်တွေစာဖတ်နည်းလာသည်။ စာဖတ်ခြင်းထက် ပိုမိုဆွဲဆောင်အားကောင်းသည့် မီဒီယာတွေကြောင့်လား၊ သူတို့ကိုယ်တိုင်ကပင် စာမဖတ်ခြင်တော့၍လား ကျွန်တော်သေချာမသိ။ ကျွန်တော်တို့ထက် တိုးတက်ခမ်းနားလာသော ပညာရပ်များကို နေ့မအားညမနားလေ့လာနေရ၍ စာမဖတ်နိုင်တာမျိုးလည်း ဖြစ်နိုင်သေးသည်။ ဇွတ်တရွတ် ကောက်ချက်ဆွဲ၍မရ။  သေချာတာတခုကတော့ ဒီနေ့ကျွန်တော်စာအုပ်မ၀ယ်ဖြစ်။ ဖတ်ပြီးသား စာအုပ်လေးတွေကိုသာ ပွတ်သပ်ပြီးပြန်တော့မည်။  အရောင်းစာရေးမ၏ ခိုးခိုးခစ်ခစ်ရယ်သံက ကျွန်တော့်ကို လှောင်ပြောင်နေသယောင်ယောင်။

  

အားမရတဲ့မျိုးဆက်

          ကျွန်တော်တို့ ဆေးကျောင်းသားပေါက်စတုန်းက ဆရာတွေပြောခဲ့ဖူးတဲ့ စကားလေးတလုံးကို မှတ်မိနေတယ်။ `ငါတို့တုန်းကဆိုရင် ဘယ်လိုတော်တယ် … ဘယ်လို ကြိုးစားအားထုတ်ခဲ့တယ်ပေ့ါ`။ ဆရာတွေကတော့ ကျွန်တော်တို့ကို သူတို့တုန်းကလို ထက်မြက်စေချင်တဲ့ဆန္ဒတွေနဲ့ တွန်းအားပေးခဲ့တယ်။ ဖြစ်စေချင်တဲ့ ဆန္ဒတွေနဲ့ မခံချင်စိတ်တွေကို နိူးဆွပေးခဲ့တယ်။ ဒါပေမယ့် တော်လှန်ပုန်ကန်ချင်တဲ့စိတ်ရှိတဲ့ ၁၉-၂၀ အရွယ်ဆိုတော့ ကျွန်တော်တို့အဲဒီစကားတွေကို စိတ်ထဲကနေ ကျိတ်ပြီးတုန့်ပြန်မိတယ်။ ဆရာတို့တုန်းက ကွန်ပျူတာ ၁၀ လုံးနဲ့ လူဆယ်ယောက်လောက် ၀ိုင်းပြီးဆော့လို့ရတဲ့ ဂိမ်းမျိုးတွေ၊ အွန်လိုင်းပေါ်မှာ အချိန်ဖြုန်းပြီး လှိုင်းစီးတဲ့ကိစ္စမျိုးတွေရှိခဲ့ရင် ဘယ်လိုနေမလဲလို့လည်း သိချင်စိတ်တွေ ပေါ်ခဲ့ဖူးတယ်။ ဟုတ်ပါတယ်။ သူ့တို့ကြီးပြင်းခဲ့ရတဲ့ခေတ်မှာ မီဒီယာဆိုတာကလည်း စာပေတခုပဲ အားကိုးမှီတွယ်ရာဖြစ်ခဲ့သလို ဖျော်ဖြေရေးပိုင်းမှာလည်း ဓါတ်ပြား၊ ရေဒီယို၊ ဇာတ်သဘင်တွေနဲ့ပဲ လူငယ်ဘ၀ကို ဖြတ်သန်းခဲ့ရတယ်။ ကျွန်တော်တို့ခေတ်လို မှားပြီးခူးဖို့ အဆိပ်သီးတွေ၊ အချိန်ခိုးတဲ့ ဖျော်ဖြေးရေး မျက်နှာဖုံးစွပ် မှော်အတတ်တွေ လွယ်လင့်တကူရှိမနေခဲ့ဘူးမဟုတ်လား။ ဒါကြောင့်မို့ ကျွန်တော်တို့ဆရာတွေဟာ စာပေပညာတွေမှာ နှံစပ်ကြတယ်။ ထူးချွန်ကြတယ်။ စာဖတ်အားသန်တော့ ပညာမိုးကုပ်စက်ဝိုင်းကို ပိုပြီးချဲ့ထွင်နိုင်တဲ့ စွမ်းရည်တွေ ရလာကြတယ်။ နိုင်ငံအတွက် အားထားရတဲ့ သားကောင်းရတနာ ဆရာဝန်ကောင်းတွေဖြစ်လာကြတယ်။

          ကျွန်တော်တို့ ခေတ်မှာတော့ အဲသည်လိုမဟုတ်ဘူး။ ကျွန်တော်တို့ရဲ့အချိန်တွေကို အင်တာနက်ချက်တင်တွေ၊ ဂိမ်းတွေ၊ ရုပ်ရှင်တွေ၊ ဘလော့ဂ်တွေ၊ စမတ်ဖုန်းတွေ၊ လက်တကမ်းရောက် အညှီအဟောက်တွေ၊ လူမှုကွန်ယက်တွေက မသိမသာ တမျိုး သိသိသာသာတဖုံ ခိုးယူစားသုံးနေကြတာကို ကျွန်တော်တို့ မလွန်ဆန်နိူင်ခဲ့ဘူး။ ကျွန်တော်တို့ ဟာ တက္ကနော်လော်ဂျီ အပြုအပြင်ခံတွေ ဖြစ်မှန်းမသိဖြစ်နေရင်း တကယ်မွန်မြတ်တဲ့ စာပေတွေနဲ့ ဝေးပြီးရင်းဝေးလာတယ်။ အဲဒီတော့ ကျွန်တော်တို့ မျိုးဆက်တွေဟာ ဟိုစပ်စပ်၊ ဒီစပ်စပ်နဲ့ versatile persons တွေ ဖြစ်မှန်းမသိဖြစ်လာတယ်။ ထန်းသီးကြွေခိုက် ကျီးနင်းခိုက်ဆိုသလို စာကောင်းပေမွန်တွေကလည်း မီဒီယာပေါင်းစုံမှာ လိုက်ကောက်သူတွေ မျက်စိလည်အောင် ပြန့်ကျဲကုန်တယ်။ အဲဒီအချက်တွေကြောင့် ကျွန်တော်တို့ ခေတ်ကဆရာဝန်လေးတွေ ညံ့ကြတယ်။ ဆရာကြီးတော်တော်များများက အားမရကြဘူး။ အဲဒီလိုပဲ ကျွန်တော်တို့ကလည်း ကျွန်တော်တို့ထက် ငယ်တဲ့ ဆေးကျောင်းသားလေးတွေ ဆရာဝန်ပေါက်စလေးတွေကို ဒီလိုအမြင်မျိုးနဲ့ ကြည့်ပြီး အပြစ်တင်မှုတွေလုပ်တာမျိုးကို ကျွန်တော်တို့ လုပ်မိကြတယ်။

          အခုနောက်ပိုင်းဆရာဝန်ဖြစ်လာတဲ့ လူတော်တော်များများဟာ ကစားကွင်းကျပ်ကျပ်ထဲမှာ ဦးတည်ရာမဲ့ တိုးဝေ့နေရတယ်။ incentive မရှိတဲ့ နယ်ပယ်တခုမှာ ဆုပ်လဲဆူး၊ စားလည်းရှုးဆိုတဲ့ အခြေအနေမျိုးတွေနဲ့ ရင်ဆိုင်နေကြရတယ်။ အရပ်ဖက်ဆရာဝန်တွေ တာဝန်ချထားပေးတဲ့ ဝေးလံခေါင်ဖျား တိုက်နယ်ဆေးရုံတွေ မသွားချင်ဘူး။ စစ်တပ်ကလူတွေလည်း ကျည်ဆံတွေကြားထဲ မသွားချင်ပဲသွားနေရတယ်။ သူတို့လည်း နိုင်ငံသားအချင်းချင်း သတ်နေတဲ့ စစ်ပွဲဆိုတာကို သာမန်ပြည်သူတွေထက်တောင် မုန်းတီးနေမှာ သေချာတယ်။ သူတို့ဆီမှာ အမိန့်နဲ့ထိန်းချုပ်တာဖြစ်တဲ့အတွက် ဒီလိုနေရာတွေကို ငြင်းပယ်ပိုင်ခွင့်မရှိဘူး။ ကိုယ့်အသက်ကိုတောင် အာမမခံနိုင်တဲ့နေရာတခုမှာ လူတစ်ယောက်ဟာ ဘယ်လောက်ကြာကြာတာဝန်ထမ်းဆောင်နိုင်မလဲ။ အဲဒီအတွက် လုံလောက်တဲ့ ထောက်ပံမှုတွေမရှိပဲ ဘယ်လိုရင်ဆိုင်မလဲ။ ဒါတွေကလည်း လုံခြုံ့စိတ်ချရတဲ့ ပါတ်ဝန်းကျင်တခုမှာ အလုပ်လုပ်ချင်တဲ့ လူတယောက်ရဲ့ အခြေခံအကျဆုံးဆန္ဒတွေပဲ။ ဒါကို ကျွန်တော်တို့ အပြစ်တင်လို့မရဘူး။ ဆရာဝန်တိုင်းမှာ ဒေါက်တာ အဲလဘတ်ရွိုက်ဇာတို့လို စိတ်ဓါတ်မျိုးရှိမနေနိုင်ဘူး။ ကျွန်တော်တို့မှာ ဆရာဝန်ဖြစ်ဖို့ အတွက် အရင်းအနှီး တစုံတရာရှိခဲ့တယ်။ ဒါကိုပြန်လိုချင်စိတ်နဲ့ ပြောနေတာမဟုတ်ဘူးဆိုပေမယ့် အရိုးရှင်းဆုံးဝန်ခံရရင် ဆရာဝန်ဆိုတာလဲ အသက်မွေးမှုပညာတခုဖြစ်တဲ့အတွက် ပေးဆပ်ခဲ့ရတာတွေနဲ့ ထိုက်တန်တဲ့ ရယူလိုမှုဆိုတာ ဆရာဝန်တိုင်းမှာ အနည်းနဲ့အများတော့ရှိမှာပဲ။ အဲသည်လို အခြေအနေမျိုးကို ကျွန်တော်တို့ဆရာကြီးတွေလည်း ရင်ဆိုင်ခဲ့ပြီးပြီပဲ။ အကောင်းဆုံးကျော်လွှားပြီး မြန်မာနိုင်ငံကိုဖက်ပြီး ပေးဆပ်နေဆဲပဲလေ။ ကျွန်တော်တို့ရောဘာလို့ မလုပ်နိုင်ရမှာလည်းလို့ တွေးမိပြီး အားတင်းရတယ်။

          နောက်တခုကတော့ ကျွန်တော်တို့ဆရာကြီး၊ အကိုကြီးတွေ ပြောပြောနေတဲ့ နိုင်ငံရပ်ခြားအတွေ့အကြုံတွေပေါ့။ ဘယ်နိူင်ငံမှာဖြင့် ဘယ်ဆေးရုံက ဘယ်လိုစနစ်တွေ ဘယ်လိုနည်းပညာသစ်တွေ ဘယ်လိုဝန်ဆောင်မှုတွေကိုပေးပြီး အကောင်းဆုံးကုသလိုက်တယ် ဆိုတာမျိုးတွေ ၊ ဘယ်သူတွေက ဘယ်လို အလုပ်လုပ်ပြီး ဘယ်လိုကြိုးစားကြတယ်ဆိုတာမျိုးတွေ ငယ်ငယ်တုန်းက ပါးစပ်အဟောင်းသားနဲ့ နားထောင်ခဲ့ဖူးပါတယ်။ ဆရာကြီးတွေရဲ့ရည်ရွယ်ချက်က ကျွန်တော်တို့ဆရာဝန်ပေါက်စတွေကို အဆင့်မြင့်ဆေးပညာနဲ့ အဆင့်မြင့်ဝန်ဆောင်မှုတွေ တာဝန်ယူမှုတွေကို အားကျစေချင်လို့ပဲလို့ မှတ်ယူရပါတယ်။ နောက်လာနောင်သားလူငယ်တွေကို ဒီထက်ပိုပြီး ကြိုးစားစေလိုတဲ့ ဆန္ဒတွေ တပုံတပင်နဲ့ စေတနာရှေ့ထားပြီး ပြောပြခဲ့ကြတယ်။ တကယ်တမ်းလက်တွေ့မှာတော့ နှမ်းတစေ့နဲ့ ဆီမဖြစ်သလိုပဲ နိုင်ငံခြားပြန်ဆရာဝန်တယောက်ထဲနဲ့လည်း မြန်မာနိုင်ငံရဲ့ ကျန်းမာရေးစနစ်ကြီးတခုလုံးကို ပြောင်းလဲမပြစ်နိုင်ဘူး။ ရောမမှာနေရင် ရောမလိုကျင့်ဆိုသလို ဘယ်လောက်ကောင်းတဲ့ နည်းစနစ်ရှိတဲ့ တိုင်းပြည်မှာ ပညာသင်ကြားခဲ့သူဖြစ်နေပါစေ မပြောင်းလဲတဲ့ မြန်မာနိုင်ငံ ကျန်းမာရေးစောင့်ရှောက်မှု စနစ်နဲ့ ဆရာဝန်တွေလေ့ကျင်သင်ကြားတဲ့စနစ်ကြားထဲမှာ တကယ်ကောင်းတဲ့နိုင်ငံတွေက ပညာသင်ကြားလာတဲ့ ဆရာကြီးတွေက ပေါ်လစီမိတ်ကာတွေအပေါ် အနိုင်မယူနိုင်ခဲ့ကြဘူး။ မပြောင်းလဲနိုင်တဲ့ လူဟောင်းတွေကြားထဲမှာပဲ နိုင်ငံတကာက သူ့အတွေ့အကြုံတွေ စာအုပ်ထဲရေးမှတ်ပြီး ဒီရေစီးကြောင်းထဲပဲ ပြန်စီးဆင်းလိုက်ကြတာပဲလေ။ အဲဒီလိုနဲ့ ကျွန်တော်တို့ရဲ့ စဉ်ဆက်မပြတ်ဆေးပညာသင်ကြားရေးစနစ်ကြီး ဟာလည်း ဒီဝဲဂယက်ထဲကကို မထွက်နိုင်ပဲ တ၀ဲလည်လည်နဲ့ အက်ကြောင်းထပ်တဲ့ ဓါတ်ပြားအိုကြီးလိုဖြစ်လို့။

          ဆရာဝန်တဦးရဲ့ ဘုံရည်မှန်းချက်တွေထဲမှာ ပိုက်ဆံရဖို့ဆိုတဲ့ (အသေးအဖွဲလို့ ဆရာဝန်အများစုလို့ ပြောလေ့ရှိတဲ့ အကြီးကြီးတခု) ကိစ္စအပြင် ရည်မှန်းချက်တွေ အများကြီးရှိမှာပါ။ ဘွဲ့လွန်တက်ပြီး စိတ်ကူးထားတဲ့ ဘာသာရပ်တခုခုနဲ့ ပြည်သူလူထုကို အကျိုးပြုသွားချင်တဲ့ စိတ်က ပိုက်ဆံရဖို့ထက် အများကြီး ပိုမယ်လို့ ကျွန်တော်ယုံကြည်ပါတယ်။ အဲဒီလို့လျှောက်လှမ်းနိုင်ဖို့ ကျွန်တော်တို့ဆရာဝန်ပေါက်စတွေအတွက် မလိုလားအပ်တဲ့ တံတိုင်းကြီးတွေ အခက်အခဲတွေ တပုံတပင်ကြီးပါ။ ကျွန်တော်တို့ ရွှေဆရာဝန်တွေ နိုင်ငံတကာနဲ့ ရင်ပေါင်တန်းနိုင်ဖို့ ကျွန်တော်တို့ အခင်းအကျင်းတွေကို အဆင့်မြှင့်ပေးဖို့လိုပါတယ်။ မြန်မာဘောလုံးအသင်းကို ကမ္ဘာ့အဆင့်မှီဖို့ ကစားကွင်းတွေ အဆင့်မြှင့်ရတယ်။ နိူင်ငံခြားသား နည်းစနစ်ဒါရိုက်တာတွေ ငှားရတယ်။ အဆင့်မှီလစာတွေ ပေးရတယ်။ နိုင်ငံတကာခြေစမ်းပွဲတွေကို ငွေကုန်ကြေးကျခံပြီး ကျင်းပပေးရတယ်။ နိုင်ငံတွင်းပြိုင်ပွဲတွေကို မက်လောက်စရာဖြစ်လာအောင် ကြည့်သူလက်တဆုပ်စာနဲ့ အရှုံးခံပြီး ကျင်းပပေးနေရတာတောင် ဒေသတွင်းနိုင်ငံတွေနဲ့ ယှဉ်နိုင်ဖို့ ကျွန်တော်တို့ ဘယ်လောက်စောင့်ရအုန်းမယ်မသိပါဘူး။ အဲဒီလိုပဲ ကျွန်တော်တို့ရဲ့ ရွှေဆရာဝန်တွေရဲ့ အရည်အသွေးနဲ့ ကျန်းမာရေးစောင့်ရှောက်မှုတွေကို နိုင်ငံတကာနဲ့ရင်ပေါင်တန်းဖို့ဆိုရင်တော့ ကျွန်တော်တို့ရဲ့ အခင်းအကျင်းတွေကို အဆင့်မြှင့်ပေးဖို့လိုမယ်ထင်ပါတယ်။ ရွှေဆရာဝန်တွေဟာ ဒီလိုအခြေအနေတွေနဲ့  နိုင်ငံတကာကိုထိုးဖောက်နိုင်ဖို့ဆိုတာ အတော်လေးခက်ခဲလိမ့်မယ်ဆိုတာ နိုင်ငံခြားပြန်ဆရာကြီတွေမသိခဲ့လို့လား၊ ပြောင်းလဲအောင်မဆောင်ရွက်နိုင်ခဲ့လို့လားဆိုတာ ကျွန်တော်တို့ အဆင့်နဲ့ တွေးဖို့ ဥာဏ်မမှီတဲ့ အဆင့်မှာရှိပါတယ်။

           ကျွန်တော်တို့အိုတီထဲကို အုံလိုက်ကျင်းလိုက်မ၀င်ပဲ အပြင်ကတီဗွီကနေ ကော်ဖီသောက်ပြီး ဆရာကြီးတွေခွဲစိတ်တာတွေကို စာအုပ်ဖတ်ရင်းဆွေးနွေးနိုင်တဲ့အဆင့် ဘယ်တော့ရောက်နိုင်မလဲ။ သင်ကြားသင်ယူမှု အထောက်ကူပြု ပစ္စည်းကောင်းတွေနဲ့ စနစ်တကျသင်ရတဲ့အဆင့်တွေ ဘယ်တော့ရောက်နိုင်မလဲ။ အွန်လိုင်းကနေ pharmacy တွေနဲ့ချိန်ဆက်ပြီး စနစ်တကျဆေးပေးနိုင်တဲ့ အခြေအနေတွေ ဘယ်တော့ရောက်လာမလဲ။ ညနေခင်း ဆေးခန်းပြေးထိုင်စရာမလိုပဲနဲ့ ဆေးရုံကနေ စာသင်ပြီးမှ စိတ်အေးလက်အေးပြန်ရမဲ့အချိန်တွေ ဘယ်တော့များရောက်နိုင်မလဲ။ ကိုယ်လိုချင်တဲ့ မဟာသိပ္ပံဘွဲ့ကို မလိုလားအပ်တဲ့ ထိန်းချုပ်မှုတွေမရှိဘဲ ဘယ်တော့များမှ တက်ခွင့်ရမလဲ။ ဒါတွေကို အကောင်အထည်ဖော်ပေးနိုင်လျှက်နဲ့ နိုင်ငံတကာနဲ့ ရင်ဘောင်တန်းနိူင်တဲ့ ကျန်းမာရေးစောင့်ရှောက်မှုကို ပေးနိုင်တဲ့ ဆရာဝန်မျိုးတွေ ပေါ်ထွက်မလာဘူးဆိုရင်တော့ ကျွန်တော်တို့ မျိုးဆက်ညံ့ဖျင်းရာကျပါလိမ့်မယ်။ အဲဒါတွေကို အကောင်အထည်ဖော်ပေးနိုင်ဖို့ ဆိုတာကတော့ ကျွန်တော်တို့ရဲ့ နိုင်ငံခြားပြန်ဆရာကြီးများက ပေါ်လစီမိတ်ကာများကို ဘယ်တော့နားသွင်းနိုင်မလဲဆိုတဲ့အချက်ပေါ်မှာပဲ မူတည်နေပါတော့တယ်။

တောကျီးဂန်း

၅-၁၀-၂၀၁၂